Nga 1 shkurti 2025, Komisioni Europian ka krijuar Drejtorinë e Përgjithshme për Zgjerimin dhe Europën Lindore (DG ENEST), përmes riorganizimit të Drejtorisë së Përgjithshme për Fqinjësinë dhe Negociatat e Zgjerimit (DG NEAR). Krijimi i saj u njoftua nga Presidentja e Komisionit Europian, Ursula von der Leyen, gjatë prezantimit të kolegjit të ri të komisionereve në shtator 2024. Ky ndryshim tregon një qasjë të re dhe fokus të shtuar në politikën e zgjerimit të BE-së.
DG ENEST asiston vendet që kanë perspektivë anëtarësimi për të përmbushur kriteret e përcaktuara nga Traktati i Bashkimit Europian dhe Këshilli Europian dhe monitoron ngushtë përparimin e vendeve të zgjerimit. DG ENEST menaxhon marrëdhëniet bilaterale të BE-së me vendet kandidate dhe të mundshme për anëtarësim, duke u fokusuar në reformat në shtetin e së drejtës, qeverisjen ekonomike dhe administratën publike. Kjo drejtori gjithashtu menaxhon shumicën e ndihmave financiare dhe teknike të BE-së për partnerët e zgjerimit dhe për vendet e Fqinjësisë Lindore, si Armenia, Azerbajxhani dhe Bjellorusia.
Për më tepër, DG ENEST ofron mbështetje të vazhdueshme për Ukrainën, duke kontribuar në rimëkëmbjen dhe rindërtimin e vendit dhe duke mbështetur Platformën e Donatorëve të Ukrainës. Kjo mbështetje sigurohet përmes disa instrumenteve financiare, përfshirë IPA III, NDICI, Instrumentin për Reformë dhe Rritje për Ballkanin Perëndimor, dhe menaxhon tri korniza investimi: EFSD+, Kornizën e Investimeve të Ballkanit Perëndimor dhe Kornizën e Investimeve të Ukrainës.
.jpg)
