"Opt-out" është një dispozitë e rëndësishme në strukturën politike të Bashkimit Europian, duke i ofruar shteteve anëtare mundësinë për të përjashtuar veten nga disa politika ose masa të caktuara të integruara, duke reflektuar kështu diversitetin e prioriteteve të shteteve anëtare në Bashkimin Europian.

Në këtë kontekst, rasti i Danimarkës shërben si një shembull për të ilustruar këtë fenomen. Në lidhje me politikën monetare, Danimarka ka qëndruar jashtë eurozonës duke mbajtur kronën daneze si monedhë kombëtare, ndërkohë që shumica e shteteve të tjera të BE-së kanë adoptuar euron. Përjashtimi monetar i Danimarkës ka lejuar vendin të ruajë kontrollin e tij mbi politikat monetare dhe të përshtatet me kushtet ekonomike të veta. Ndërkaq, Danimarka numëron gjithashtu dhe dy klauzola të tjera të mospjesëmarrjes, atë në Drejtësinë dhe Çështjet e Brendshme si dhe shtetësinë e BE-së. Ndërkohë në qershor 2022, danezët mbajtën një referendum mbi përjashtimin në lidhje me Politikën e Përbashkët të Sigurisë dhe Mbrojtjes (CSDP). Shumica e danezëve votuan për të shfuqizuar përjashtimin duke hyrë, që nga 1 korriku 2022, në politikën e përbashkët të sigurisë dhe mbrojtjes të BE-së.

Klauzolat e mospjesëmarrjes mund të sjellin tensione dhe vështirësi në harmonizimin e politikave të BE-së dhe në ruajtjen e solidaritetit ndërmjet shteteve anëtare. Kjo shkakton vështirësi në vendimmarrje dhe mund të ulë nivelin e bashkëpunimit ndërmjet shteteve anëtare për disa çështje të caktuara.